Заменик командир на Шумска полиција од Демир Хисар заработи кривична пријава, бидејќи не само што не поднсувал барања за поведување прекршочна постапка против дрвокрадците, туку и им ги враќал запленетите возила на дрвокрадците.
Иако досегашното искуство остава впечаток дека борбата против еколошкиот криминал за уништување на шуми и корупцијата во шумарството се залудни, бидејќи многу мал број на судски предмети имаат завршница со пресуди против извршителите, службите задолжени за борба против криминалот и корупцијата продолжуваат да си ја вршат работата.
СВР Битола, до Основното јавно обивнителство Битола, поднесе кривична пријава против Д.Т.(58) од Демир Хисар поради постоење на основи на сомнение за сторено кривично дело „злоупотреба на службена положба и овластување” казниво по член 353 од Кривичниот законик.
Пријавениот Д.Т., во својство на заменик командир на Шумска полиција во Демир Хисар, во два наврати постапил спротивно на неговите овластувања. Имено, во с.Смилево и с.Прибилци биле затекнати две лица како со возила превезуваат огревно дрво без документација, но пријавениот, иако бил должен, не поднел барања за поведување прекршочна постапка против лицата, а наредниот ден им ги враќал возилата.